Elezzjoni Ġenerali 2017 - Reġistru Elettorali ppubblikat fil-Gazetta tal-Gvern
STQARRIJA MILL-KUMMISSJONI ELETTORALI
REĠISTRU ELETTORALI PPUBBLIKAT FIL-GAZZETTA TAL-GVERN
Il-Kummissjoni Elettorali tinforma lil kulħadd li għadu kif ġie ippubblikat ir-Reġistru Elettorali rivedut li fuqu hija bbażata l-Elezzjoni Ġenerali li se ssir fit-3 ta’ Ġunju, 2017, fil-Gazzetta tal-Gvern tas-6 ta’ Mejju, 2017. Kull min kellu l-kwalifiki meħtieġa biex ikun reġistrat bħala votant skont id-dispożizzjonijiet tal-Att dwar l-Elezzjonijiet Ġenerali (Kap.354), sad-data tal-għeluq, l-1 ta’ Mejju, 2017, u ismu ma ġiex inkluż fir-Reġistru u kull votant li ismu, l-indirizz jew xi partikolaritajiet tiegħu mhumiex murija b’mod korrett, għandu, skont l-artikoli 39 u 42 tal-Att dwar l-Elezzjonijiet Ġenerali, sa nhar is-Sibt l-20 ta’ Mejju, 2017, sabiex jagħmel appell lill-Uffiċjal Reviżur biex ismu jiġi inkluż jew issirlu korrezzjoni fil-partikolaritajiet tiegħu fir-reġistru elettorali.
Kull votant reġistrat li:-
Jgħid li, minħabba xi raġuni legali, l-isem ta’ xi persuna għandu jinqata’ barra mir-reġistru għax din m’għandhiex il-kwalifiki meħtieġa; jew
Jgħid li l-isem, l-indirizz jew xi partikolaritajiet oħra rispettivi ta’ xi persuna mhumiex murija b’mod korrett fir-reġistru;
jista’ wkoll, skont l-artikoli 40 u 42 tal-Att dwar l-Elezzjonijiet Ġenerali jagħmel appell għal dan il-għan lill-Uffiċjal Reviżur, sa nhar is-Sibt, l-20 ta’ Mejju, 2017.
Kull persuna li tixtieq tagħmel appell lill-Uffiċjal Reviżur tista’ tikseb għajnuna mill-Uffiċċju Elettorali. Kulħadd huwa mfakkar dwar l-importanza li jivverifika li ismu ġie inkluż fir-Reġistru Elettorali. Jekk dan ma jsirx jista’ jiġri li persuna ma tkunx intitolata għall-vot fl-Elezzjonijiet Ġenerali li se ssir fit-3 ta’ Ġunju, 2017.
Min jixtieq jara r-Reġistru tal-Elezzjonijiet Ġenerali jista’ jarah fl-Uffiċċju Elettorali. Iżda wkoll, wieħed jista’ jara jekk hux reġistat bħala votant f’dan ir-reġistru billi jidħol onlajn fis-sit elettroniku tal-Kummissjoni Elettorali, www.electoral.gov.mt, fis-sezzjoni “Pubblikazzjonijiet” u jagħfas il-buttana “Nista’ nivvota?”
6 ta’ Mejju, 2017
