Liġi dwar il-Finanzjament ta’ Partiti Politiċi
STQARRIJA GĦALL-ISTAMPA
Il-Kummissjoni Elettorali tikkonferma li dawn l-erba’ partiti politiċi huma rreġistrati skont il-Liġi dwar il-Finanzjament ta’ Partiti Politiċi (Kap. 544): Alternattiva Demokratika, Moviment Patrijotti Maltin, Partit Demokratiku u Partit Nazzjonalista.
Il-Partit Laburista kien applika fiż-żmien stipulat biex ikun irreġistrat iżda l-Kummissjoni, wara l-iskrutinju li sar skont il-liġi msemmija, sabet li parti tal-istatut kurrenti tal-istess partit ma kienx jissodisfa l-liġi. Il-Partit Laburista kien infurmat bis-sitwazzjoni u ntalab jaderixxi mal-provvedimenti tal-liġi msemmija. Il-Kummissjoni qed tistenna statut emendat li jikkonforma mal-liġi qabel tirreġistra l-Partit. Kapitlu 544 tal-liġijiet ta’ Malta ma fihx provvediment għal reġistrazzjoni ta’ partit b’mod provviżorju.
Ir-rapporti tad-donazzjonijiet riċevuti mill-imsemmija erba’ partiti rreġistrati matul is-sena 2016, ġew sottomessi għand il-Kummissjoni fit-terminu stabbilit bil-liġi. Dawn ir-rapporti jsiru pubbliċi meta l-Ministru responsabbli, b’Regolament, jistabbilixxi ż-żmien u l-format li għandhom b’hekk isiru aċċessibbli.
Il-Kummissjoni tgħarraf li kull meta jkun meħtieġ, toħroġ stqarrija lil pubbliku.
www.electoral.gov.mt
